今日（25日）下午接近2時，青葵公路一輛960號線九巴與2輛工程車相撞，釀成多人受傷。乘客謝女士憶述，事發時巴士正駛往屯門，自己坐在下層後座，突然九巴撞到前車，她當即閉上雙眼，「首先撞咗去前面先，跟住再彈返去後面，又係撞個頭，跟住再撞多兩下，根本唔知自己，以為自己碌咗落地」，雖然她已綁好安全帶，惟衝力將安全帶「撞到甩咗」。
車廂內一片混亂，全車人不斷叫喊，她一張開眼看望：「全地都係人嚟㗎，全部都打橫晒，瞓晒喺度。」謝女士的腳部亦撞腫，尾椎骨疼痛，手亦痛得不自覺手震。她表示覺得當時車速不算太快，但撞擊力卻很大，當時車上約有十多人。
